人生如遊戲，返銀行工、從事保險業，跑數交差乃家常便飯，但返到屋企，原來開隻OnlineGame嚟玩，一樣要「跑數」儲經驗值，打大佬，遲早壓力爆煲！正進行封測嘅網絡遊戲《傭兵天下Online》，除咗遊戲主線，仲有勁多支線任務，即係話，過關爆機唔係一味儲經驗值，輕輕鬆鬆一樣掂！
記者：陳國輝
跟原著發展 組隊插旗
唔知碇嘅老友，可能以為《傭兵天下》只係個純粹遊戲名稱！如果有睇開網絡小說，應知道佢一早就紅遍中、港、台，後來更被玉皇朝睇中，仲喺去年推出港版漫畫！
不過講到最多Fans，始終係大師嘅原著最能感動人，劇情大致係話一名小角色艾米，如何憑堅定不移嘅信念，由一名小傭兵不斷往上爬，最後成為受人、神、魔三界尊崇嘅傭兵王；而遊戲內，你將會扮演一名小傭兵，並透過自己進行任務時嘅不同抉擇，嚟推動原著小說劇情發展，可以話係一邊睇一邊玩！
除咗畀小說迷過「戲」癮，你仲可以約埋網友組隊，建立一支超級傭兵團！其實喺主線劇情，有部份須以傭兵團之名參與，例如圍毆Boss、爭奪資源，或者去其他人地盤踢竇！好處唔止提升經驗值，仲可以揚名立萬，俾多啲人識你。
百款小遊戲救豬升級
關於提升經驗值，剛才已經提到，《傭兵》唔似得傳統RPG，要花成幾十粒鐘喪打嘍囉，再穿上一身銅皮鐵骨裝甲，跑數博升級！呢隻Game設計咗過百條分支劇情，只要完成任務就獲得經驗值，最搞鬼係「任務」極盡騎呢，例如會要求你摘葡萄、採果實，甚至乎要你抱起隻豬仔一直逃亡，避開所有敵人！
睇見咁多款MiniGames，感覺又幾似PS3嗰隻《人中之龍》。然而，兩者最大好處，係你有自由選擇玩與唔玩；相反，進入戰鬥模式之後，你幾乎係焗打，因為《傭兵》採用「移動戰鬥」系統，亦即係話，你必須邊跑邊打，唔似得傳統「打木樁式」玩法，俾你慢慢諗，再輪流出招；作為一隻ARPG遊戲，唔使儲LV但都算有啲難度。
《傭兵天下Online》
平台：Windows
類型：ARPG
人數：網絡多人
公測：2月27日
售價：官網免費下載、免月費（裝備需購買點數咭）
官網： http://yb.gameone.com