好多養貓之人，都喜歡在家居栽種植物，但事實貓咪好喜歡咬噬植物，經常成為摧花兇手，不過主人嚴懲兇手之前，必小心留意貓仔有無中毒徵狀，因為好多靚花如風信子、鬱金香，甚至好似好健康嘅蘆薈或年花，貓貓食咗隨時係咁先！
記者：張文蕙
攝影：伍慶泉
Model：CoCo@GME
喫節慶花 貓貓好危
Q-PETS店長Jennifer指，好多家居常見植物，其實對貓貓暗藏危機，例如剛過完年，家家戶戶買落嘅水仙，貓貓食過後會有流口水、嘔吐、腹瀉、呼吸困難等徵狀！「當你發現佢哋飲水或進食的習慣有改變，平日蹦蹦跳，突然變得沒精打采，甚至四腳喪失協調性，無晒方向感，就要小心佢哋中咗毒！」
芋、黛粉葉，甚至情人節常收到嘅鬱金香，都係含「有不可溶解草酸鹽」嘅植物，貓兒誤食，會因為針狀晶體與蛋白溶解酵素，造成嚴重口部與咽喉刺激，甚至會破壞血管，造成出血現象。
「好多注重健康人士，都會自家種蘆薈，貪佢睇得又食得，其實這是屬於腸胃刺激植物，貓貓吃後會不停拉肚子或腹痛！」聖誕花仲會引起貓貓的心律不正，看來愛貓之人買植物，還是不要太應節好了。
小麥草利吐毛
雖然好多植物都會令貓貓中毒，但貓貓愛吃植物、八卦抓泥，都是牠們的天性與樂趣，懂得揀合適的植物，對牠們絕對是益多於害！
Jennifer表示，貓貓愛用舌頭清理自己的毛毛，長時間使然下，就需要吐出胃中囤積的毛球：「例如小麥草，含有維生素及豐富的纖維素，可以作為有效的嘔吐劑！」而青草葉面上的絨毛，亦能黏附着貓貓消化道的纖毛，從而達致催吐作用。當貓貓誤食有毒食品或腸胃不適時，牠們也會自然地找草吃，令自己可將食物吐出來，所以在家準備貓植物是愛貓表現。
「貓咪真正需要的是汁液中的『葉酸』，一旦貓咪自覺需要時就會去尋找，好獨立㗎！」對貓咪有利的草分別有小麥草、大麥、綠豆植物等，普通貓草種子，一般種一星期有得食。
GIMPET所推出的盒裝貓草甚至推出不同口味，心急主人可選Hy-Gras，Jennifer指只需澆水一次就會生草，不過草會較幼身。多汁液之選則為Soft-Gras，草身較軟，免卻貓貓插到喉頭、嘔吐大作！
貓草玩具
薄荷葉 食完好High
薄荷葉也是貓貓酷愛的植物，功效是能起自然興奮作用；很多寵物店都有現成乾薄荷葉賣，甚至混入貓罐頭糧食或小吃中，要貓貓快樂可以好簡單！此外KONG更推出不同種類的小動物玩具如箭豬或羽毛老鼠，肚內中空，讓你可將貓草放入。最搞笑還是YEOWWW！的罐頭魚，打開會有三條塞滿貓草嘅魚仔，貓咪收到實High爆！
有入無出 胃內生毛球
貓咪並沒有消化毛髮的能力，吞進肚子裏的毛髮，一部份會隨大便排出，另一部份留在胃內逐漸變大，當到達一定程度，貓咪就會通過嘔吐，把胃內毛球吐出；但有些貓咪不能把胃內的毛球定期吐出，這些毛球便會在胃腸內越變越大，最後影響貓咪健康。
毛球症的癥狀
嘔吐：吐膽汁，有時帶毛髮，甚至吐出「圓柱狀」毛球。
咳嗽：吞嚥時毛髮刺激喉頭導致。
便秘：毛髮卡在直腸造成。
胃口不佳：因為腸胃蠕動不正常。
查詢：
a.Q-PETS（26689199）
b.Dogaroo@Kittydoggy（27892708）
c.繽紛園藝店（23809801）
場地提供：Q-PETS