由退休警察組成嘅「愛護香港力量」，多個成員噚日朝早去到港大，所為何事呢？原來係要聲討李成康。佢哋指李成康喺8.18風波中屈警察禁錮，指佢誠信蕩然無存、滿口謊言歪理，由於不滿其言行，所以拉隊到港大聲討，要求處分李成康；又要求李成康向公眾同警方道歉，還警察一個公道。
佢哋話短短一小時已派完3,000單張，仲有好多教職員圍觀，不過八方現場所見，師生反應冷淡，大部份人都唔係幾理佢哋搞邊科。喺般咸道遭冷待，八方建議「愛護香港力量」應該過海，去九龍塘約道七號大屋外，事關大屋主人先至係真正誠信蕩然無存、滿口謊言歪理，一班大人大姐針對一個學生，何必？