近日NBA爆出一位紅透半邊天的華裔籃球新星，各網絡平台都被這位林書豪瘋狂洗版，以林的姓氏創出來的新詞彙──Linsanity（林瘋）更成為美國各大體育報章的標題。其實車界最近都有位新星到港，活力年輕的豐田PriusC，以廿萬元的震撼價將混能大平賣，反應之大一樣咁Linsanity。
記者：許維雅
攝影：黃子偉
Model：Eagle
電池7年保用添信心
環保重要性大家都知，不過往往需要金錢來堆砌，有機蔬菜特別貴，能源效益標籤的電器都貴過人，每當權衡愛環保定愛荷包時，好多人都寧願愛荷包。其實邊個唔想揸混能車慳油錢，但車價高昂，計過條數慳埋啲油費都唔夠貼車價，一輪掙扎後還是放棄混能車。全新到港的豐田PriusC，舊年於東京車展以新世代平價Hybrid亮相經已十分矚目，普通版定價$209,500十分吸引。今次試駕的鮮橙色PriusC，則是貴一萬元左右的Champion版，比普通版多了皮軚環及自動光線調校LED頭燈等，最大分別是普通版只得輪圈蓋，貴版就配15吋合金軨，呢一萬元似乎好難走得甩。至於車主另一關心問題，PriusC電池大膽開出保用7年的保證，立刻叫不少車主放下心頭大石。
油耗每公升行28公里
車價比大佬Prius平一大截，大家可能會以為廠方將貨就價，PriusC變成一部實用性大降的車仔，其實它同樣是一部五門五座的揭背車。雖然車身尺碼（3,995×1,695×1,450mm）確實比Prius細一級，但廠方刻意將Hybrid系統位置調低及將電池改置於後座底部，成功優化車廂空間，令高度達1,175mm的內櫳感覺依然闊落。全新型號的PriusC亦配上一副全新Hybrid系統的餡料，新電池不單止更細更輕，而且還可以發揮更高效能，配合1.5公升引擎同步交流驅動，總輸出馬力達101匹。雖然力量稍遜大佬，但卻可帶來更慳油的效果，平均油耗約28km/L。以鮮橙色作為PriusC的標記顏色，可見廠方希望藉此車開拓年輕人用混能車的市場，外形感覺有點像Prius跟Ractis的混合體，活潑動感外形可以討年輕人歡心。內櫳陳設雖然簡潔，但配備一點也不寒酸，包括Keyless、定速巡航系統、免提藍芽及軚環TouchTracer顯示功能等，中控頂部更有一個3.5吋的彩色小屏幕，駕車途中更會幫你計分睇你慳油叻唔叻，啱晒貪玩年輕人。
ToyotaPriusCChampion
引擎：1,497cc直四VVT-i配同步電動馬達
馬力：73PS/4,800rpm（油電混合動力總輸出101PS）
扭力：111Nm/4,000rpm
傳動：CVT無段變速
售價：$219,100
查詢：23054555（皇冠車行）
