本版高慧然專欄上星期日（二月十二日）講「我們納稅，為了甚麼？」指「香港是個全民納稅的地方，單身人士年收入10萬8千元已屬納稅黨……」高慧然恐怕誤會了，香港不是全民納稅的地方，全港有三百六十六萬名就業人士，納稅人只有一百五十萬，納稅人只佔就業人士之41%，佔全港市民21%，距離全民納稅之途，差好遠，在我的有生之年，不會見到。
此外，月入九千，年入10萬8千，根本不用納稅。2011/12年度嘅個人免稅額就是10萬8千元，下一個財政年度2012/13嘅個人免稅額提升至12萬元，月入九千人士扣除免稅額後，斗零唔駛俾。高慧然舉例子之朋友A，已婚未育，有已婚人士免稅額，現在係21萬6千元，下一個財政年度係24萬元。朋友B未婚住父母家，2011/12年可申請供養父母免稅額3萬6千元，2012/13可申請3萬8千元，如收入低於15萬8千元，明年唔駛交稅。以上資料，全部公開，並非秘密，收到稅局綠色信封時，內有扣稅交稅資料，一睇便知！
以2011/12年度薪俸稅及個人入息課稅嚟講，收入10萬8千零1元至20萬元嘅納稅人有42萬3千人，佔納稅人數目28.2%，最高收入90萬元以上者有12萬人，佔8%，呢批人繳交嘅稅，佔去薪俸稅493億嘅大多數。
香港稅制簡單，填表報稅，花時間唔駛十五分鐘，世所稱譽，係香港一個最大嘅競爭優勢。三位特首參選人之中，已成為候選人嘅何俊仁嘅政綱話要檢討香港稅制，研究引入累進的利得稅制度，同時取消薪俸稅的標準稅率，讓高收入人士繳付更多的稅款，即係話，上述每年收入超過九十萬元嘅十二萬納稅人，如果何俊仁當上特首，可能負擔更多。唐英年嘅政綱就話：「穩定政府收入來源，維持基本簡單稅制。」至於梁振英嘅政綱，有七版紙講經濟，但左丁山唔知係唔係睇漏眼，總係見唔到有關稅制之論述。何俊仁講累進稅制，乃泛民多年來嘅意思。不過香港話就話有不少人贊成民主，擁護直選，按此邏輯推論，何俊仁咪有好多人支持？但睇鍾庭耀之民意調查，何俊仁民望極低，可見不少人講一套做一套，何俊仁其實不受市民歡迎，可見政治現實相當詭異。