卓韻芝近日戀事多，大受老外歡迎，「鬼仔2號」德國仔上周跟阿芝的街頭喪啜照曝光，床照主角「鬼仔1號」法國仔得悉此事，前晚馬上由巴黎人肉速遞到港箍煲，兩人在尖沙嘴海傍邊吹海風邊漫步，法國仔更脫下西裝披在阿芝身上，冧招盡出。
下月就33歲的才女卓韻芝，近日被爆連環鬼仔，先與「鬼仔1號」法籍男模的纏綿床照流出，上周又被本報拍到啪蛋速食貌似荷李活型男祖迪羅（JudeLaw）的「鬼仔2號」德籍金融才俊。德法大戰一觸即發後，兩男為退情敵出盡法寶。
冒雨吹海風
鬼仔1號法籍男模發現阿芝與鬼仔2號在中環當街喪咀後，醋意大發，前晚立即相約阿芝到尖沙嘴約會箍煲。前晚8時，記者發現阿芝在iSQUARE的HMV出現，二人會合後先選購雜誌，逗留約半小時便離開，兩人又站在街邊談心，鬼仔1號邊傾邊煲煙，阿芝則從胸前的衣袋拿出兩隻烚蛋吃。
見鬼仔1號全程照顧阿芝，稍後他到附近七仔買甜筒餵飽嗜甜的阿芝，阿芝舔住甜筒，與食雪條的鬼仔1號手拖手走向情侶熱點尖東海傍。二人沿途打情罵俏，雖然氣溫急降，下着毛毛細雨，但無損二人拍拖雅興，他們在海傍一邊吹風一邊談心。越夜越凍，衣衫單薄的阿芝跟男伴的愛火燒得正烈，鬼仔1號怕冷親阿芝，遂有脫下外套披在阿芝身上。原本這溫馨送暖應很受落，但阿芝卻忽然口噏噏一輪，隨之變臉，二人似有爭拗，當街耍花槍。
「MJ最低分」
鬼仔1號對阿芝像海底針的女人心不懂招架，一臉尷尬，二人最終不歡而散，看來德法之爭，鬼仔2號暫時仍佔優。阿芝自跟音樂人陳輝陽和樂隊Mr.成員MJ分手後，轉攻洋漢，MJ日前曾寸她說：「又係鬼佬。」記者昨日致電阿芝問她德法鬼仔誰較高分？她抵死說：「佢哋嘅分數就唔好講，總之計起上嚟MJ最低分，佢（MJ）話我八國聯軍，仲話荷蘭（未來男友），等我個心都虛一虛。」
採訪：比華利、黃曉程、彭琮然
話你知：楝篤騷加場
兩次在街邊啜鬼仔和食烚蛋來補充體力的卓韻芝，自言目前正努力練肌肉和體能，準備應付下月在灣仔會展舉行的兩場「死去活來OneNightStand」棟篤笑。據悉自從啜鬼事件爆出後，棟篤笑門票去得特別快，下月17和18日那兩場已經爆滿，故現在加開19日一場，現已開始賣飛。
