做男人要有膊頭，做唐英年背後的女人，肩上擔子不輕。唐太郭妤淺一肩扛起大宅僭建地庫的責任，昨晚陪同唐英年向傳媒解話時收起招牌式燦爛笑容，一邊聽丈夫發言，一邊「扁嘴」。當唐太說到「呢件事係我一手搞出嚟」，終於忍不住淚水，在鎂光燈前啜泣。
「呢件事係我搞出嚟」
「約道7號係我太太嘅物業」、「建造地牢係我太太嘅主意」……唐英年甫發言即明示妻子是僭建元兇，唐太一直眼神恍惚，顧盼四周，直至丈夫說：「等我太太講幾句說話先。」，她才回過神來，讀出事先預備好的發言。
唐太聲稱一向全力負責家裏的裝修，「主要想為我企屋人起一個安樂窩，冇諗過後果。我係veryverysorry」。她多次為丈夫求饒。唐太簡短發言完畢，唐英年即被傳媒連番追問誠信問題，這時唐營公關向記者說：「大家有冇問題問唐太？」
唐太回答提問時，每句說話都維護丈夫，後來更當場灑淚，「今日唐生係唔想我出嚟嘅。呢件事件我一手搞出嚟，佢唔係好理屋企啲嘢，平時返工好辛苦好忙。佢真係好多嘢都唔知。我係唔想佢出嚟講，真係唔關佢事」。她冷靜下來，繼續呼籲市民支持丈夫，「佢係一個好人，你唔好當佢係壞人。希望你哋畀機會佢」。
被問及事件會否影響丈夫選情，唐太指丈夫目標並非做特首，而是服務市民，又把話題扯到傳媒身上，「如果你住喺我度，屋企又唔返得，你哋傳媒調晒嗰啲嘢（吊臂車），連屋企幫我做嘢啲人都好驚，你覺得係咪好合理呢？希望你哋有人嘅感情」。兩夫婦最後在公關指示下退後一步讓記者拍照，唐太從口袋拿出紙巾拭淚，向記者輕聲說了一句「唔該」。要做的做完，要說的說了，記者會正式落幕。《蘋果》記者