賈曉晨（JJ）早前在無綫劇集《缺宅男女》飾演自閉少女，獲不少觀眾溺愛，劇中的她集萬千寵愛於一身，但慘遭吳卓羲欺騙感情，現實中JJ同樣垂青男方，直認拍劇時曾過電，她說：「佢成日都電我㗎，戲中都過到電。」
入行多年的賈曉晨近期憑無綫劇集《缺宅男女》高采貽一角，令不少觀眾留下深刻印象，劇中飾演自閉少女更與吳卓羲有感情戲，JJ直言雖然已非首次拍劇，但今次角色令她深深體會到作為演員的滿足感，她說：「因為之前啲角色都會比較性感、比較女人啲，第一次做一個咁清純嘅女仔，係個好開始。」
密實清純獲讚
令JJ最感開心是劇集出街後，獲fans大讚，她說：「佢哋見到我話，嘩！估唔到原來你咁清純。成件事其實反而對我嘅得着多過觀眾所知道，因為真係改變咗我一向嘅形象。」
JJ首次獲監製賞識，更與吳卓羲有段情，但最終被他欺騙感情，可有被吳卓羲電親？JJ說：「佢成日都電我㗎，戲中都過到電，但拍完就冇囉，我都唔係佢鍾意嘅類型，不過自己都好欣賞佢，佢人又好好同好笑，佢係一個好簡單嘅男仔，如果佢單身都可以考慮吓。」
外表弱質纖纖的JJ原來不像戲中般受保護，年多前她拍完電影《打擂台》後一直有習武，經陳觀泰介紹下更成為周強師父大聖劈掛門下女弟子，見JJ耍扇拳時亦有板有眼，但她表示由於疏於練習，故目前狀態難以登大雅之堂：「因為之前拍電影前開始有練武學咗一年，起初成日練，但有段時間太多工作，少咗練習，連師傅都話我懶咗。」
組織溫馨家庭
另外，JJ提到在《缺》劇中的高采貽是受哥哥過份保護的單純女孩，現實中她亦希望可以受到保護及被愛：「喺濟南嚟咗香港七年乜嘢都要靠自己，精神上真係好辛苦，我都好想嫁人有個溫馨家庭，受到保護。」問到她目前可有男友呵護時，她說：「都有㗎，不過都係外國返嚟嘅男仔。」
採訪：王崇穎、汪芷寧
攝影：陳志嵐、葉君海
