「唐宮」始終係有錢佬重地，又唔係法定古蹟，並唔係隨便開放㗎！繼前日屋宇署食閉門羮後，噚日又有人去唐宮㩒鐘仔但被拒之門外。今次自動送上門嘅係一個酒窖商，佢哋諗住唐唐遲早要搬走「雜物」拆僭建，於是把握機會登門推銷紅酒儲存服務。噚日上午10點幾，一位酒窖職員手持公司單張，去到九龍塘約道唐宮㩒鐘仔。傭人對屋宇署官員同對酒窖推銷員都一視同仁，同樣唔俾佢哋入屋。推銷員於是效法屋宇署官員嘅做法，將單張放入信箱，逗留片刻就走人。個職員話佢哋個酒窖設喺火炭，面積寬敞，可以為唐唐解決紅酒問題。唔通佢收到風，唐唐個「雜物房」真係有好多紅酒？