浸大「早洩」特首參選人民調搞出一場風波，校長陳新滋委任小組調查，保住趙心樹教席，只係辭咗院長職務，好多人覺得咁樣「打手板」罰得太輕，要求浸大再調查。
八方噚日見到陳新滋，佢話要一個學者辭職唔做院長，其實已經係好嚴厲嘅處分喎，事關好影響聲譽，喺學術界嚟講，絕對係冇晒面嘅事。
陳校長又透露，趙心樹係tenure教授，即係獲浸大終身教席，如果貿貿然炒佢，分分鐘官司都有得打。校長又話實情趙心樹心情都好低落，「如果畀100萬出嚟，可以洗甩呢單嘢，佢一定肯！」如果唐營公關冇打電話去浸大，如果浸大冇做民調，如果唐英年民望唔係咁低，如果浸大校長有番少少風骨……可惜，世事係冇如果嘅！