沙膽虹昨天如常回公司做《爽報》晚版，不久，負責靜態新聞的同事急急腳走來，話收到有人爆料，提供了一份唐英年約道七號屋2003年的設計圖則，計劃僭建的2,400平方呎地庫有酒窖、日式浴堂、健身室、多用途影院，並非唐所說的「挖深咗」和當雜物房，足夠證明他連日大話連篇；更致命的就是有專業人士話明該圖則一定不獲屋宇署批准，但唐太堅持要照起，至於這圖則最後如何獲批？或是先批則後加建？就更有待政府徹查。
見到如此大新聞，同事問是否要等埋《蘋果》一齊出？張圖則出咗，傍晚全世界傳媒都會轉載，豈非變成大圍料？沙膽虹諗都唔諗，決定唔留，《爽報》晚版晒冷全出，並加印三萬紙。
沙膽虹身兼《蘋果》和《爽報》老總，所謂手掌係肉，手背係肉，怎可能只將新聞留給《蘋果》做獨家？除非是《蘋果》記者自己做到的獨家故事，否則大圍新聞的內幕料也好，獨家照片也好，讀者爆料也好，《爽報》晚版能夠趕到的，都一定要先給《爽》晚！
另外，新聞是發展的。《爽報》晚版即使搶了《蘋果》頭啖湯，《蘋果》仍有很多跟進和追訪可做，仍然可以有新的獨家料！今次唐英年地庫新聞，《蘋果》記者就不負眾望，再取得更多圖則和內幕，踢爆唐英年！
對於如此重大的新聞，沙膽虹絕對不敢用聰明來處理，多留一天半天，萬一給人截糊豈非成千古罪人？況且公眾有知情權，這些涉及公眾重大利益的新聞，越早出街越好。
（後記：《蘋果》副老總陳沛敏嫌沙膽虹加印三萬太少，認為應該印多啲淹沒中環。）
沙膽虹