港股終破悶局，向二萬二進發，本欄上周五率先推介盈信（015），4日狂飆64%，公司出通告話想分拆業務上市。不過，究竟拆咩同點拆，得老闆先知，幾時拆更加係個謎，不妨等回到6毫附近再慢慢收集，高追隨時坐艇，得不償失。
噚日大戶炒藍籌，二三線股表現冷靜，仲有大把水位可追落後，光滙石油（933）上周盈喜後，股價由1.80元扶搖直上，見2.40元先掉頭，近幾日以旗形整固後，已蓄好動力再上衝，MACD雙牛擴大，現價入貨先睇2.90元，上升潛力28%，錯失上輪升浪的戰友，今次萬勿錯過！
光滙主營海上供油、倉儲及油輪運輸業務。去年經濟不景，但公司盈利仍大躍進，上周三發盈喜，料下半年純利增加。以按年增長5成計，即期內賺5億銀；保守假設上半年增長20%，光滙全年（截至6月底）純利將達16.3億銀，按年增長28%。現價預測PE只有9.4倍，以目標價2.90元計亦僅12倍。如經濟持續復蘇，或公司增加派息，估值可再上調，屆時升幅難以估計。
公司近月大賣電視廣告，增強知名度，記得廣告標榜光滙市值逾200億元，與現時160億市值仍有一段距離，不妨睇住呢個市值做目標。
魏力