真係冇辦法唔寫JLin。
昨日晨早睇紐約人作客對速龍直播，紐約人一直落後，前兩節失誤頗多，冇乜表現。諗住林瘋現象到此為止，點會估到佢第四節最尾先大爆發，完場前1分05秒鏟籃，已失平衡但竟然入波兼博得罰球追成平手，到最後一擊，人人起立，他拖至仲有0.9秒多少少在三分線出手，應聲穿針，90對87，實在難以置信，連多倫多速龍主場球迷也為他喝采。JLin最後憑一己之力逆轉勝，睇NBA的激情又再返嚟。
球探走漏眼有原因
《Moneyball》專欄仲寫乜鬼渣馬，一早就要寫「林瘋現象」，因為佢就係Moneyball的人辦，典型蔗渣價錢，燒鵝味道，「UndervaluedPlayer」的上位故事，連怪雞經濟學家StephenDubner也要趁熱鬧，解構林瘋現象。兩星期前仲諗住散工合約到期就要拜拜，隨時搞到返大陸打CBA，為何各大球會球探都走漏眼。美國NBA選人亦十分專業，在中學打得好已進入球探的雷達，但點解冇人會為意呢條友仔，今時今日仲會有JLin呢種石頭爆出嚟的傳奇球員。Dubner話有兩個原因，一個比較敏感係「以貌取人」，亞裔、又唔係神高神大，仲有，係華人先以為哈佛畢業係Something，在美國傳統運動，名校哈佛係完全唔入流。幾樣加加埋埋，哈佛畢業亞裔只會令人諗起書獃子，點會係打NBA控球後衞人才，佢根本就係怪雞，唔似樣。NBA明星一係早已本國成名，好似姚明、卡達朗，一係就黑人攞運動獎學金入讀體育名牌大學，JLin如此背景，邊有人會留意佢，最搞笑連教練D'Antoni都承認對佢所知唔多。
第二個原因係NBA每年選秀只有兩輪共60人，好容易走漏眼落選，反而MLB職棒有50輪，走漏機會相對細。
特首泥漿戰 不如睇JLin
JLin大爆發，唔單止係球技，每次賽後訪問，佢都會歸功隊友，他在陣中好願意交波，為隊友助攻，連一班二打六也因他而打高一班波。今仗有大牌史杜達米亞復出，但最後一次進攻，關鍵時刻將責任交予JLin，表示球隊上下對他信任，實在難得，佢有條件成為整合球隊的領袖。究竟JLin仲可以走幾遠？MagicJohnson、SteveSmith話佢唔講得笑，ForReal，奧尼爾表示想在奧蘭多AllStarGame見到佢出賽，認為JLin係一個洛奇式的故事。
奉勸各位，有時間不如睇JLin神奇之旅，絕對比睇兩位半百大叔日日泥漿摔角賞心悅目、激動人心得多。
添馬男