家陣唔少政黨通知傳媒採訪，都會用最快捷嘅方法：手機短訊。估唔到備受忽略嘅特首參選人胡世全都識得用呢一招，噚日發短訊畀所有行家，通知大家去採訪佢嘅活動。正當八方好奇怪，點解胡世全會有八方嘅電話號碼時，赫然發現：個發送號碼原來嚟自民主黨！
究竟係民主黨短訊系統被入侵，抑或呢位民建聯前黨員改邪歸正做白鴿？無論前者定係後者，都係大新聞，八方急急向民主黨要員查詢，卻得出一個極「蝦碌」嘅答案。原來胡世全喺地區事務上同黃成智向有合作，以前胡嘅活動通知都曾經由民主黨代發；點知黃成智嘅助理政治敏感度不足：忘記昔日同路人，已成鐵頭何「對手」，竟然仲代發短訊，鬧出一個小笑話。