噚日啲通識題就算真係有人答得到，今日呢條倫理題睇怕都會叫佢投降︰你外公嘅堂家姐個仔嘅舅仔，即係你邊個？我諗大部份人未聽完前嗰部份已經藐嘴而走，但竟然因為有呢啲「遙遠親戚」之嫌而要刊登聲明立此存照，實在令人啼笑皆非。而所謂有親戚關係，其中包括最終嗰位舅仔就係梁振英，另外仲有自行報案嘅係明報助理總編輯兼偵查組組長戚本業……咁無綫個著名監製戚其義係咪都要查吓族譜申報一下？話晒佢嗰套話題電視劇《天與地》滿有政治隱喻，仲要擺咗倉底兩年，又咁蹺喺選舉期前先推出？應該有啲嘢！
鐵頭仁樂做茄喱啡
不過呢啲穿鑿附會嘅嘢，都係留番畀唐營嗰邊再發揮，其實呢排兩陣相互攻訐的戲碼越來越弱，少少碎料已經攞嚟大做文章。加上現屆政府非但「親疏」，就算「梁唐」也是有別，一個唔覺意就乘機踹上一腳，雖未致於下三濫，卻極礙眼且盡失公務人員中立之義。至於早前竟然仲有人高舉甚麼「君子之爭」，如果不是政治幼稚，就肯定當周圍啲人係儍仔。不過點睇都仲係未及號稱「鐵頭」嘅嗰位（叫我諗起「少林足球」嘅大師兄），本來都有啲期望呢位「仁」兄會為呢個小圈子選舉增添氣氛，但係冇諗到佢真係唔當自己係一個演員，而樂於做一個茄喱啡，然後等食「超級區選」個飯盒！
講真家無論係俾人越撬越開嘅「西九門」，定係越挖越深嘅「紅酒窖」，相對香港所處的困局和窘境，都不過係小事一件。雙非、自由行和近在眉睫的自駕遊衍生的種種問題，都不過是隨着中港融合而來的文化衝擊和後遺症，就是因為分隔兩地的門戶早已大開，有些事情已經返唔到轉頭，守門無從。
抹黑不斷 選舉鬧劇
而到底我哋未來嘅領導人點樣可以既能維護港人利益，又可以得到阿爺嘅信任，左右逢源先係關鍵所在。至於因為社會環境改變，而導致經濟利益分配不均，貧富更見懸殊，階級之間劍拔弩張的現象，彼此矛盾不斷「深」化，來屆特首如何能夠平衡各方，調整傾斜亦是其重要任務。
兩營對此沒有着墨，只有沒完沒了的抹黑。選舉已經是鬧劇，再者家鬧上加爛，我其實都想認係兩位嘅遠房親戚……你老表呀！
盧先亞