曾與黃偉文（Wyman阿Y）傳不和的楊千嬅，前晚挺着大肚子，以神秘嘉賓身份現身阿Y作品展獻唱三首歌。二人在台上台下互送禮物，並上演一幕情深擁抱，泯滅6年恩仇，千嬅被感動到眼濕濕，令演唱會有個完美結局。
楊千嬅與黃偉文原本老友鬼鬼，但05年突傳千嬅不滿阿Y填寫的歌詞令二人反目，前晚千嬅現身確是一個驚喜。
穿上由JohannaHo設計的黑色透視晚裝的千嬅，先後獻唱《可惜我是水瓶座》、《勇》和《野孩子》三首耳熟能詳的歌曲，她牽起裙子笑說：「我好安全㗎，着波鞋。」她還感觸地說：「好開心，人與人之間嘅情感，絕非旁人表面可以明白同理解。」
碌爆前半生人情卡
接着阿Y便送上千嬅至愛的紫色BB車及鮮花，搞到千嬅眼濕濕，二人情深擁抱，6年恩怨一筆勾銷。有網友在千嬅演出前已作「預告」，指她一定會在台上落淚，結果被網友批中。
演唱會至晚上12時才完結，一眾歌手在後台開香檳慶功，但千嬅和彭羚均沒有現身。問到阿Y會否開Part2，他說：「上半生嘅人情卡已經碌晒，除非有機會喺鳥巢開演唱會先考慮。」阿Y透露今次是親自致電邀請千嬅做嘉賓，他說：「係我打畀佢，開頭佢話考慮吓，話要睇BB情況，開騷前兩日佢話OK冇問題，我就即刻搵設計師幫佢做衫。」
遵守承諾互相支持
千嬅在台上感動到喊，問阿Y是否同樣感動？他笑說：「佢好易喊，但我冇喊，因為之前幾場喊晒。」他透露二人在後台有交流，他說：「佢喺身上攞四封利是畀我，話婚後未派過利是，所以預備咗兩套唔同利是，而我亦有花時間買禮物畀佢，紫色BB車好難搵。」
阿Y續說：「我同千嬅係識於微時，我哋曾經講過無論發生乜嘢事，我都會去佢婚禮，佢亦會嚟我嘅演唱會，唔知佢仲記唔記得呢個承諾，但我都有去佢婚禮。」
採訪：馬建華
攝影：仇志德