阿爺一句幫手救歐洲，港股即以大升市回敬，唐牛問過經紀，佢話唔覺多咗客掃貨，根據傳統智慧後市應仲有得再去，隨時升到你唔信。噚日推介嘅美麗華酒店（071），埋單升2.1%，成交創逾4年新高，絕不簡單，未上車嘅戰友請把握最後機會。
既然地產股有勢，一於搵落後股，二線地產股遠東發展（035）噚日只升2.2%，值得憧憬。截至去年9月底，遠展中期賺8446萬銀，按年跌60%，主因竣工物業減少，不過紅磡新盤寶御早排已經開售，賣咗唔夠一成已套現5000萬銀，如果樓市小陽春吹至一手市場，呢個主打上車客嘅盤肯定受捧。加上手持逾七成麗悅酒店（2266），市值近22億銀，相當於遠展市值八成，即係集團喺香港、澳洲、上海等物業，只係值5億銀？認真說不過去。遠展噚日收報1.42元，日線圖呈圓底，現價買入，升破1.50元再加注，目標睇2字頭，屆時PB只係0.5倍。
唐牛