張國榮和梅艷芳在02年阿梅的「極夢幻演唱會」中完美演繹一曲《芳華絕代》，10年後，陳奕迅（Eason）和何韻詩前晚在黃偉文的演唱會上翻唱這首歌，大玩三級，在台上舌戰10秒鐘，Eason更用手「搓詩breast（胸）」，全場譁然。
六場的黃偉文（Wyman）作品展演唱會前晚在紅館圓滿結束，想不到最後一場，陳奕迅和何韻詩竟來個破格演出。二人在台上演繹張國榮和梅艷芳合唱的《芳華絕代》，一向性向成疑的阿詩與Eason同穿筆挺西裝，驟眼看還以為兩個男人合唱。
Eason：康堤嚇親
坐在紅凳上登場的Eason與阿詩越唱越埋身，邊唱邊互摸身軀，Eason放盡地「掃股」兼「搓胸」，唱到「來臣服我之下」時更將阿詩的頭按在胯下。最令人驚嘆一幕，是尾聲時Eason突然擁吻阿詩，雖然阿詩有一刻猶豫，但最終放膽吻下去，且越咀越落力，阿詩還先伸脷，Eason惟有「接招」並順勢用手搓阿詩的胸，二人濕吻近10秒才落幕，全場大叫，連徐濠縈都被嚇呆。
據悉這場「舌戰」是Eason出的鬼主意，他在台後陰陰笑跟工作人員說﹕「我實『揸』佢同咀佢，到時睇佢點！」演唱會後阿詩直言今趟「蝕底晒」，自稱沒伸脷，但被Eason踢爆說：「你係有嘅，我見你咁，我都唔蝕底，我個女（康堤）仲嚇親，問點解菇菇（何韻詩）同哋哋（Daddy）咁嘅？當畀個女早熟啲囉。」Eason越講越high說﹕「你（阿詩）係咪狼虎之年呀？我唱到『臣服之下』時咪順勢按落去（下體），之後錫錫吓，感覺到有嘢湧埋嚟，阿媽教落，唔好蝕底，佢伸我再伸。」
對於被指摸胸，Eason說：「唔係，只係輕撫胸部啫。」阿詩笑說：「你唔止喎，台上演出上咗身咁。」Eason表示曾與祖兒合唱過這歌，但不敢提出這個大膽演繹，阿詩問為甚麼？Eason笑說：「你個人open（開放）啲。」阿詩指激吻前做足準備工夫，她說：「我有食八仙果同香口膠，不過落台後發覺生痱滋。」
容祖兒：睇到暈
阿詩好友祖兒透露有在後台欣賞，她說：「梗係唔錯過得，睇到都暈一暈呀！冇諗過伸脷咁激。」會否覺得阿詩蝕底？祖兒說：「我又唔係佢，如果我唱，Eason突然咁咀埋嚟亦惟有硬食，但佢好多脷苔，要畀個刮佢。」Eason太太徐濠縈也帶女兒捧場，她昨在微博見到Eason和阿詩的咀相和留言「你想不想吻一吻」時，她回覆說：「想！傾國傾城！」還放了個流口水公仔。
採訪：馬建華
攝影：仇志德
