政壇黃金剩女陳淑莊Tanya舊年過咗甩拖後首個單身情人節，今年2.14終於有約──之不過係密會醫生。事關佢最近患上重感冒，之前仲發咗兩日燒；本來已好轉，點知前日情人節，突然又有燒，結果今年的情人節活動，就係睇完醫生返屋企瞓覺。
Tanya今次病情都幾嚴重，前日氣溫近20℃，佢返屋企冲完熱水涼，兼夾冚埋兩張被之後，一滴汗都冇出過。病重中嘅佢沮喪間諗過，係咪要喺屋企裝番個平安鐘，以免暈倒都冇人知。
最近為網上節目扮演Lady渣咋嘅佢，原來俾唔少人話佢好似王祖藍，尤其係對眼；本來佢要拍新一輯節目，可惜病到鼻音太重而要押後，費事影響扮嘢水準。