做政治公關，難！做個為小圈子選舉塗脂抹粉嘅政治公關，更難！豬、狼嘅公關團隊係女人天下，前主播、前高官乜都有。豬狼最近爆出咁多醜聞，班女公關母性十足，為救二惡英搞到人都癲。其實佢哋以前個個係獨當一面嘅女將，點知喺呢場豬狼大戰中，統統中毒失晒控，八方聽到唔少關於佢哋嘅忘情護主失控實錄，不妨同大家分享一下。
前傳媒大姐 情急兇記者
有位極度資深嘅前政治記者，走咗去為唐唐做政治化妝。但凡同佢交過手嘅記者、民間團體成員都話，覺得呢位前輩「變咗」。有行家問佢有關唐唐嘅負面新聞，佢就發惡「兇」記者：「呢單嘢你都寫？有冇問過你老細？」
佢又鍾意「教」記者乜嘢係好新聞，原來但凡對狼振英不利嘅新聞，佢都覺得好有新聞價值。至於佢老細嘅衰嘢，佢就一味話唔值得報。試過有唐唐嘅「負聞」出街後，呢位公關打畀記者追究，話佢哋都冇畀到回應，單嘢做乜仲出街，又話律師團隊會「研究」單嘢。嘩！人哋都問咗你，你唔做回應記者就唔准寫？咁你個公關都好易做啫！佢亦試過擋攝記影唐唐，搞到最後要向行家道歉。
前電視台大將 冇答當答咗
記者天職就係打破沙盆問到底，加上唐唐口齒不清左閃右避，自然要不斷追問。咁有一位做過電視台嘅唐營公關大將，見到唐唐越講越錯，自己都壓力好大。佢最近主持記者會時，就不停咁阻記者追問，甚至腰斬記者會。有記者同八方講，唐唐明明都冇答到佢問題，大家追問，點知呢位公關就大大聲話「呢個問題答咗啦，下一條」。喺記者會上，佢經常將某份被指親梁報章嘅記者當係透明，唔俾佢哋提問。
有行家不滿到向唐唐家臣林大輝投訴，林大輝都好無奈咁話：「唉，我都知道嘅。」
前主播 衰衝動
話說有日，狼振英俾政府出稿爆佢喺西九規劃比賽做評審有利益衝突。隻狼即刻搞吹風會反擊。
睇見振英哥係咁俾人「質」，身邊嗰位做過女主播嘅公關突然飛撲出嚟，好肉緊咁話「等我嚟講……」
在場嘅記者全部聽到O晒嘴，心諗究竟你知唔知自己做緊乜嘢？知唔知邊個先係被訪者呀?好彩梁營中人出手㩒住，佢先知衰，尷尬咁話「唔好思意，我衝動咗」。
呢位女公關雖然喺吹水會咁主動護主，但唔少行家就抱怨，佢個電話，係永遠都冇人接聽㗎！
過氣女高官 肉緊搶答
梁營內仲有位過氣前女高官，一直為隻狼打理競選辦嘅家頭細務。喺同一吹風會上，前女高官全程肉緊實，見到振英哥答問題答得唔好，突然間又企咗起身想要代答。梁營中人即刻叫佢唔好，但係前女高官仲係唔甘心，即時寫咗張紙仔畀振英哥，要佢照稿讀。
八方仲聽聞，有位女公關，喺振英哥行年宵時，故意篩走晒啲有龍字嘅揮春，以免同龍豬唐宣傳。原來女人真係好「細心」㗎！
mailto:[email protected]