組合Twins噚日喺新城宣傳新碟《2befree》，咁啱出碟，鍾欣桐（阿嬌）就傳新緋聞。有傳無綫主持黎國輝（阿感）力追阿嬌，所以先同模女友「E奶紅姑」鄧伊玲（阿旦）分手，阿嬌即刻話：「唔好拖我落水。」喺側邊嘅蔡卓妍（阿Sa）亦幫口話：「佢（阿感）同阿旦一早散咗，我哋識咗阿感十幾年，大家熟到好似兄弟。」阿嬌仲出口幫阿感話：「今次件事真係唔關我事，女方要做新聞唔好拖我落水，阿感都有私下同我道歉，我都知佢唔想做衰人角色，畀人食住上。」
阿嬌仲話希望阿感下次唔好再遇人不淑，重新遇一個真心對自己好嘅女朋友。阿嬌強調同阿感只係好朋友，件事唔會破壞雙方友誼。但有指阿感向阿嬌示愛，阿嬌同阿Sa齊心話係阿旦單方面幻想出嚟，又可能係個女仔公司問題。
兄弟相稱
同樣被傳阿感力追嘅江若琳（Elanne），噚日到美孚接受訪問，講到阿感傳追佢又追阿嬌，Elanne話：「流到爆，我同阿感以兄弟相稱。」Elanne話阿感平日好少提及前女友阿旦。