全民3D，實在太耐無玩過橫向動作Game了，見到PSVita最新嘅《墨鬼》確係興奮，主角為成就偉業、救出公主，揸住一碌魔法毛筆捉邪捉鬼，簡單一筆就可畫出符咒殺敵，更神奇係仲可畫橋避陷阱、召喚神鳥幫拖打大佬，一路畫一路殺，仲勁過哈利波特支魔法棒。
記者：徐影龍
攝影：黃子偉
Model：Christie
邊畫邊補充墨汁
好多日系名牌Game早已轉向鬼佬化，日式遊戲買少見少，今勻《墨鬼》回歸和風，連角色同敵人都以毛筆勾劃出嚟，背景用上水墨色彩，整體視覺風格已經夠特別，加上最大賣點係喺個輕觸芒度不停手指指鬼畫符，變出花樣百出嘅攻擊，好鬼馬。
實際試玩又真係幾過癮，主角為救出光姬，一關一關咁殺落去，齋靠㩒掣，已組合出近十種動作同斬擊，最過癮係玩家手指畫出一條黑線，喺個芒度就會變成橋或踏板，讓主角跳上去避開鋸齒陷阱，只要「墨汁計」足夠，你就可以不斷畫橋「走上路」，喺墨汁橋消失前，地下一堆敵人就完全吹你唔脹。雖然「墨汁計」有限，唔會俾你亂咁畫，不過只要好似磨墨動作咁、不停掃吓PSV個機背，墨汁計就會慢慢回復，讓你又再大畫特畫。
煉成陣畫出召喚獸
神奇毛筆豈止變橋咁簡單？玩家仲可喺畫面「鬼畫符」殺敵，隨意畫心心、星星、寫字乜都得，之後字體就會燃燒，Burn到敵人卜卜脆。筆者嘗試多種畫法，喺有限墨汁內，畫出「S＋II」效果最好，燃燒範圍大兼慳墨汁，足夠你連燒兩次。金錢攻擊，果然自古至今皆難以匹敵。
魔法毛筆第三招，就係起壇搵墨神幫拖。點一點召喚獸Icon，再順序畫出「煉成陣」，便可Call出鳳凰詠妃同獅導兩大神獸，成半個畫面咁大隻，現身後又抓又射，相當兇狠！不論推倒敵方戰城，抑或力拼巨大Boss都相當好用。
《墨鬼》
機種：PSVita
類型：動作
人數：1人
開發：ACQUIRE
售價：$298
