電訊商彈弓手，玩殘早續約早出手機怕蝕底嘅客戶；銀行出百年紀念鈔，個個搶購求快轉手賺番筆，香港社會講求行動迅速，錯了炒燶了再算。但足球場上，對住意大利球隊，惟快不破是錯不了；國王亨利告別戰，其實阿仙奴作客A米最利好消息係華美倫復任中堅，受讓下盤及冷W兼捧。
國王真的有膊頭幫到手！這6個禮拜廠迷笑的總比愁的多。有小弟死黨兼常感失望嘅阿仙奴粉絲早前點出，「銅像翻生」係老謀深算嘅雲格想轉移擁躉、不滿球會戰績視線嘅點子。不過任雲格部署如何精妙，也算不到有亨利出場，足總盃靠佢一戰定江山、算不到大炒布力般七個一皮；更神奇地完場前接應發霉艾沙維傳中球一撐，反勝近月唔識輸嘅新特蘭。亨利真係老了，速度尤其減慢，但有佢在全隊士氣全面提升；有佢在，成班敗家仔前鋒至肯稍為爭氣，尤其家着佢件14號波衫嘅接班人禾仔，真係要好好振作！
歐聯16強即對A米，其實絕非一支下下籤，阿仙奴從來多剋死意兵，A米比3年多前主場負阿仙奴0:2強不了多少，部份人腳仍熟口熟面；阿仙奴當然也缺少當年入球功臣艾迪巴約及法比仔，但前線有尹佩斯，配合後生嘅前修咸頓師兄弟禾仔同張伯倫打4-3-3。只要中場分波嘅阿迪達及桑治肯加快進攻節奏，兵工廠作客要破「慢A」非難；尤其係下半場等對手體力下降係最佳機會，當年如是；AC去年同日輸給熱刺亦是臨尾香，到年尾迎巴塞，兩度追平下最終都要輸畀對手。雲格也算不到梅迪薩卡突受傷，華美倫恨到由左閘踢番中堅了；有佢拍上月球會最佳球員哥斯尼，阿仙奴防線趨穩，或是今場博下盤嘅最佳理據。下次見報(18/2)
文：蘋果波神
今日
重心推介
熱選：阿仙奴（下）
冷選：阿仙奴勝（3.4）