謝霆鋒近日愛上煮食，一直希望跟霆鋒復合的張栢芝亦投其所好學做煮飯婆。前日，栢芝便拖埋大仔Lucas到超市瘋狂購買牛排和整蛋糕材料，甚至買埋焗爐焗蛋糕，莫非栢芝想向霆鋒送愛心蛋糕來箍煲？
張栢芝去年與謝霆鋒離婚後，一直有傳栢芝想跟霆鋒復合，近日甚至有消息指栢芝由陽明山莊搬到霆鋒金鐘栢舍寓所對面的奕居，以方便跟霆鋒見面。不過，霆鋒日前早已公開表態不會復合。霆鋒近日愛上煮食，栢芝亦一於投其所好，培養自己的煮食興趣，希望跟霆鋒有共同話題，拉近二人距離。
栢芝前日拖埋大仔Lucas及胞弟張豪龍等到超市買餸，栢芝在超市狂掃一粒鐘，共買了4個手推車滿的食物，認真誇張。
一行六人出動
前日傍晚6時許，栢芝與大仔Lucas、張豪龍及數名友人一行6人到尖沙嘴city'super買餸，但就未見細仔Quintus蹤影。雖然栢芝戴上口罩，但仍不時被途人認出。現場所見，栢芝買了牛排、整蛋糕的材料、凍肉、汽水、麪包、玩具和小食，兩部手推車載得滿滿。其後栢芝還揀選了一部焗爐，明顯是用作焗蛋糕之用，由於昨日是情人節，不禁令人懷疑栢芝想親手整愛心蛋糕送給霆鋒作為情人節禮物，希望霆鋒回心轉意跟她復合。
職員傍住購物
一直坐在手推車上的Luacs，其後要求落地四圍行，行了一會他更扭計要求栢芝買糖糖說：「買嗰個、買嗰個！」栢芝經不起Lucas苦苦哀求，遂答應囝囝說：「好啦好啦！」得Lucas開心不已。
逛超市時，栢芝和豪龍發現記者拍照，栢芝為不想被打擾，遂向超市職員求救，由職員傍住購物。栢芝在超市逗留了足足一小時後，結果買了4個手推車滿食物和物品，估計連焗爐起碼花費數千元，付款後栢芝就拖住Lucas由職員通道離開。
採訪、攝影：楊浩賢、彭琮然
