蘋果財經版〈金融人語〉噚日唔開名披露一位城中富豪打算搞草根超市，雖然冇開名，但一睇都知係講緊恒基地產（012）主席李兆基（四叔）。華華打聽後，原來四叔係捐錢扶貧至真。
專門幫助新來港人士同少數族裔嘅新家園協會，四叔位大公子李家傑係創會成員之一，早排呢個組織計劃搞幾間專賣平價乾貨嘅超市，畀會員有個地方買到平嘢，唔使吓吓幫襯大型超市。
拍板後，新家園協會四出搵人捐錢贊助，自自然搵到李家傑，係人都知四叔捐錢冇手軟，二話不說就決定由恒地旗下溫暖工程基金捐過千萬元畀新家園協會，成為呢個平價超市計劃嘅贊助人之一。成件事其實係四叔捐錢做善事，唔係話要同其他城中富豪開嘅超市直接競爭。
聽講新家園協會下星期就會開記者會公佈詳情，李公子都可能會出席。
講開四叔，下周一係佢84歲牛一，聽聞佢都係一如以往，約埋家人、恒地高層同老友記，喺屋企筵開十多席食餐飯。數吓手指，淨係大仔細仔已經幫佢生咗6個孫仔，俾佢哋團團圍住唱生日歌，四叔到時肯定笑到見牙唔見眼，加上恒地股價近日升到嘭嘭聲，四叔心情梗係靚爆啦。
mailto:[email protected]