東西方情人節都過埋，渣打趕住喺新正頭前搞春茗，噚日佢哋喺總行筵開6圍宴請傳媒。近日全城熱炒中銀紀念新鈔，排隊人龍耗費唔少警力維持秩序。話說渣打喺09年都發行過特別面值150元嘅紀念鈔票，噚日就成為遊戲環節嘅禮物，渣打香港揸fit人洪丕正（Ben）好幽默咁話，渣打呢張紀念150周年嘅特別鈔，既優質，大家又唔使排隊搶購。
渣打香港前年賺86億元，集團本月底就公佈業績，Ben哥叫記者估吓嚟緊渣打盈利幾多，最近磅嗰位，獎品係可以同該行任何一位高層食一餐免費午餐。莫非渣打想效法股神畢菲特，喺飯桌上發表未來市況偉論，點石成金？渣打經濟師關家明就好聰明，引述前白宮經濟顧問薩默斯話，家唯一肯定嘅，就係市況好唔穩定！