蘇亞雷斯唔肯同有好深牙齒印嘅艾拉握手，搞到滿城風雨；點知連佢間球會利物浦都唔撐佢，仲鬧爆佢講大話。結果係點？咪係阿蘇同企喺佢嗰邊嘅領隊杜格利殊，齊齊出嚟道歉囉！
阿蘇因喺英超首循環主場對曼聯時，種族歧視紅魔嘅黑人後衞艾拉，結果俾英足總重罰停賽8場。佢堅持自己冇侮辱過艾拉，故此心生不忿，上周六英超作客曼聯嘅賽前，唔肯同艾拉握手；領隊杜格利殊亦詐儍扮懵，竟然話賽前唔知阿蘇會咁做。本來好哋哋握吓手、事件就會告一段落，但佢兩個再生事端，令事件火上加油；紅軍高層即時「做嘢」，施壓要佢哋道歉，更將阿蘇擺上枱。
利物浦行政總監艾爾話：「我哋對蘇亞雷斯非常失望。佢之前同我哋講會同艾拉握手，佢誤導我哋同唔肯同艾拉握手，都係好唔啱。」連紅軍球衣心口贊助商嗰間銀行都加一腳，發表聲明話對阿蘇呢單嘢感到失望。俾艾爾插之前，阿蘇已率先「耍冧」，但只係為「唔握手」，嗰句「對唔住」唔係同艾拉講，「我同領隊傾過之後，明白到自己做錯；我犯咗錯，而且好後悔搞到咁。我應該同艾拉握手，我就呢件事道歉。」杜帥則表示：「身為利物浦領隊，我顧及球會利益，所以我都要道歉。」
艾拉原來有「童年陰影」
可能阿蘇覺得單嘢俾人屈，先會咁大反應，但點都好，聽聞佢唔肯向艾拉伸出友誼之手，就激嬲咗利記班高層，認為佢損害球會形象；有人認為佢喺晏菲路應該再冇運行，只要其他球會有好價，就會第一時間賣走佢。話時話，艾拉日前自爆17歲為意丙嘅馬爾薩拉踢比賽時，俾球迷鬧係死馬騮，所以佢發誓，他日再俾人種族歧視嘅話，一定唔會啞忍，仲會幫自己攞番個公道！
另外，英國傳媒話，阿蘇唔肯同艾拉握手，搞到兩隊球員賽後喺球員通道上有少少衝突；曼聯門將迪基亞無辜受牽連，俾人送咗篤口水佢嘆，真係慘！