劉鑾雄（大劉）除咗炒股掂，投資藝術品都有一手，2010年被美國雜誌《藝術新聞》列為全球十大藝術收藏家及全球200位頂尖收藏家當中第6位。佢最近罕有接受《福布斯中國》雜誌訪問，好有信心咁話，如果認真計，全球頂尖收藏家當中，佢一定排前三位，原因係自己「夠雜」，「因為只要市場有流出來，夠好、夠靚、我都要。」
投資之路由理髮師開始
大劉自爆三十幾年前就開始投資藝術品，啟發同指導佢投資藝術品嘅係一位理髮師，同時係一位從內地偷渡來港嘅中國藝術家。大劉06至07年先後買入安迪華荷嘅名畫《毛澤東》、保羅高更嘅《清晨》，仲有清雍正雙鶴香爐。大劉亦自爆近排買咗畢加索嘅《LesFemmesd'AlgerF》，「去年上半年要還價4200萬，現在1600萬就買到，太值了！」
而佢最鍾意嘅一幅畫，係放喺寫字樓一幅群象圖（圖），係美國畫家Jean-MichelBasquiat嘅作品，因為畫嘅左上方寫住evergo，同大劉賣風扇起家嘅公司愛美高同名。佢18年前喺瑞士拍賣行嘅畫冊見到，覺得有緣，用十幾萬美元買入。三年前有人叫佢攞去拍賣，話值1200萬美金，佢都唔賣。
大劉亦自認係紅酒收藏家。「我告訴我的朋友，全世界最好的紅酒收藏家，我一定排在前三位。」
大劉透露，25年前開始買酒，「那時年輕，喜歡玩，鍾意開party，一星期至少開三至四次party，每晚最少喝掉30多支紅酒……那時Lafite1000蚊一支，現在存有幾千支。」佢估計，儲埋嘅紅酒值4億美金（約31億港元），分別放喺香港同倫敦屋企，不過家已經好少飲，過時過節用嚟送禮。