馮仁昭四圍超：兒子張默出冊　張國立調虎離山 - 馮仁昭

憑內地劇《鐵齒銅牙紀曉嵐》喺香港響朵嘅演員張國立，佢個仔張默一樣係演員，曾經喺電影《讓子彈飛》中扮演老六。張默上月底喺北京因吸毒被捕，被判入順義看守所13日，噚日凌晨期滿。

夫婦頭耷耷

前晚10點幾唔少傳媒喺看守所等候，冇幾耐就見張國立架約200萬人民幣嘅黑色吉普車，司機揸住停喺門口，當時坐喺後座嘅張國立伸個頭出嚟同警衞講嘢，當記者衝埋去影相，佢就即刻閂窗，而佢老婆鄧婕同樣喺車上，跟住吉普車直駛入看守所裏面。

約兩個鐘後，先有兩架警車駛出看守所，跟住張國立架吉普車亦駛走，車上見張國立頭載cap帽一臉鬍鬚，個樣相當憔悴，佢一見記者影相即耷低頭，而鄧婕同樣露出尷尬表情，但係車上就唔見張默。跟住張國立架車駛到朝陽區一幢高級住宅，張國立同鄧婕落車，問張默係咪已經獲釋？佢哋都冇回答，急步走入大廈，馮仁昭覺得張國立同老婆係施展調虎離山計引開晒啲記者，等張默靜雞雞離開看守所。