政府大動作破狼，諗住爆出西九門，就可以凍結中場，封殺前鋒，防止狼隊突擊。
可是，政府派出闖將曾德成與楊立門兩位後衞，立功心切，舉腳過高，擺明要人唔要波。球迷心水最清，點會唔知底細。
球賽很快進入關鍵下半場，橫死掂死，狼隊被迫絕地反攻，到時埋身肉搏，招招攞命，見血封喉；甚至非常埃及波，兩邊粉絲互撼，黑心走糖，大聲罵娘，卒之踢到暴動，死人塌樓。最想收爐前社會一片大河蟹的曾蔭權爆。看來，禮賓府這份job真唔易撈，臨done前都會出糗，唔埋得尾。時也命也，難怪曾公已經謀定後路，下台後搵屋搬上深圳，一來避開特區那批由他一手引入的北方自駕遊的奪命魔爪，二來不再睇豬狼面色做人。唉，不是人人都是董先生啊，拍桌子喝停高級公僕，要有番咁上下後台耶。
西九門仍在發酵，一天未被消化，一天狼仍然是新聞人物，風雲到痺。唐老鴨星味漸黯靠邊站，暫時最適合的角色，是做臘鴨煲。