09年跟台灣音樂才子陶喆上演街頭啜爆的美少女廚神岑潔儀（Zoey），戀情玩完後前年火速搭上33歲經營鐵礦生意的馬來西亞籍華僑Dixon，二人下月7日在峇里島拉埋天窗，Zoey日前偕未婚夫到尖沙嘴選購金器辦嫁妝，但因為Zoey錫住老公荷包，反而引起一場鬥氣小風波。
即將25歲的陶喆舊愛、美少女廚神岑潔儀，日前雀躍公佈下月7日當龍年新娘，與比她年長8歲的有米男友Dixon結婚，榮陞陳師奶，一對新人屆時會在峇里島舉行熱辣辣婚禮。
試戴一粒鐘
準新娘Zoey近日忙於為婚事做準備，日前就跟未婚夫到尖沙嘴金至尊選購傳統龍鳳鈪準備婚嫁金飾。
人逢喜事精神爽，Zoey急不及待先到首飾店揀首飾，大約半小時後未婚夫Dixon到來會合，店員熱情招呼Zoey，她不時左試右戴，Dixon貼心給予意見，全程有傾有講。其間，Zoey還親到店外的櫥窗，吩咐店員取出鎮店之寶給她細看，在店中擾攘約1小時但並無收穫。
慳荷包累事
Zoey失望與Dixon十指緊扣離開，二人朝海港城方向行去，他們最初還如連體嬰黐到實，但行到中途，Dixon忽然甩開未婚妻的手，兩人似為籌備婚禮鎖事而鬧小風波，記者昨日致電Zoey，她說：「吓，畀你哋見到呀，佢叫我買多啲金器，結婚要戴多啲，但我又想慳住佢荷包，所以咪有少少拗撬，家冇事啦，我哋交畀奶奶同老爺話事。」Zoey表示婚後老公會支持她繼續演藝工作，先過二人世界，造人大計則順其自然。
採訪：比華利
攝影：陳順禎