東亞（023）噚日放榜，李國寶貴為主席，雖則近年已放手交畀下一代打理，但都有撐場，不過就非常之hea，除咗一開波讀咗啲powerpoint後，全程冇答過問題。可能業績冇乜驚喜，記者會又喺下晝開，飯氣攻心起嚟，都考驗緊大家嘅集中力，經過一輪數字、數字、再數字轟炸後，「清閒」嘅寶哥哥終於忍唔住瞌眼瞓。
瞌瞌吓擘大眼
寶哥哥幾十年來，開會密過食飯，華華發現佢已經將瞌眼瞓提升至最高境界，幾可同《神鵰俠侶》瞓喺條繩上面嘅小龍女有得鬥。話說正當大家以為寶哥哥變咗睡寶寶，有分析員一口氣問咗幾條問題，誰不知寶哥哥即刻擘大眼搶答：「你只可以問一條問題。」國寶不愧為國寶，厲害！到業績會夠鐘，寶哥哥又一馬當先，一支箭咁走咗，華華追都追唔切。
東亞中人同華華講，身為唐唐競選辦主席嘅寶哥哥近排有口難言，家特首跑馬仔開咗閘，好多嘢都唔講得。
寶哥哥屹立銀行界多年，係上司公司董事，又係立法會議員，啲應酬真係由年頭排到落年尾，分分鐘忙過龍豬唐同狼振英，所以要爭取時間休息囉。
李華華
mailto:[email protected]
