電盈、有線寬頻同城市電訊即將獲發免費電視牌照，加埋無綫同亞視，五國混戰可謂一觸即發！不過，呢場戰役未殺到埋身，無綫最近已慘被內外夾擊！
電訊魔童王維基不停挖角，效力咗無綫18年嘅總經理陳志雲早前又冇癮辭職，而最新消息話六嬸方逸華都已正式向董事局辭任副主席同董事總經理一職，仲會係3月25號離任，令統領無綫45年嘅邵逸夫年代正式畫上句號。
造就合作機會
六叔、六嬸去年以86億將無綫賣盤後，其實都傳過好多次話六嬸會離開無綫，但六嬸一向係女強人，唔打呢份工亦唔代表佢會退休，聽講佢離開無綫後會全身投入邵氏拍電影，仲會繼續做無綫非執行董事，由六嬸提攜嘅梁乃鵬、李寶安同樂易玲雖然冇跟住走，但反而造就無綫同邵氏多啲合作機會。
噚日無綫外事部副總監曾醒明漏口風話：「方小姐到目前為止都仲履行緊副主席同董事總經理嘅職責，但佢只需要同董事局交代，如果係同六叔一樣會有正式公佈。但正如樂小姐（樂易玲）講，終會有呢日發生，佢都可能有咁嘅打算。」另外，無綫將繼續有人事變動，做咗董事多年嘅利孝和夫人亦會讓位畀自己個仔，而陳志雲嘅空缺，到家仲搵緊獵頭公司幫手。