上禮拜六晚嗰場英超曼聯大戰利物浦，紅魔贏2:1報番英足總出局之仇。但我求大俠最記得，就係蘇亞雷斯同艾拉嘅對手戲。淨係賽前握手嗰吓都夠晒精采，艾拉捉住阿蘇手臂，想同佢握手，點知阿蘇一嘢撥開人哋。到完場後，艾拉（中）又即刻走去阿蘇（左）面前慶祝擺明挑釁，好在球證（右）見到，即刻分開佢哋，否則分分鐘開拖都似！賽後，曼聯領隊費格遜承認兩個球員都有錯，但佢大鬧阿蘇：「佢咁做係有可能搞到球迷騷亂！呢個人係利物浦嘅恥辱，冇資格再為利物浦踢波！」紅軍領隊杜利格殊就暗撐阿蘇：「如果有人老屈我係種族主義者，我都唔會同佢握手。」所謂寃寃相報何時了，我求大俠希望下次雙紅會時，唔會再有咁嘅場面出現。