我求大俠真係要借用「賭王」陳金城喺電影《賭神》講過嘅金句「後生仔始終係後生仔」，嚟話吓24歲嘅中國桌球手丁俊暉。小丁曾自稱係利記粉絲，但日前竟變成曼聯粉絲。猶記得小丁早排着住紅軍波衫兼攞住英超冠軍盃影相，張相post咗係利記官網，條題仲寫住MasterDingisLFCfan（小丁係紅軍粉絲）。點知身為紅軍迷嘅小丁，日前竟然走去曼聯嘅卡寧頓練習場參觀；咁都未算，佢仲着埋曼聯練習衫影相（圖），之後仲同紅魔其中一名教練篤波。曼聯同利物浦係世仇，加上阿蘇種族歧視艾拉單嘢，搞到雙方關係麻麻；可能小丁覺得冇乜嘢，但我求大俠深信如果俾紅軍球迷睇到，定會好反感，覺得佢係牆頭草！講開小丁，佢周一喺威爾斯桌球公開賽首圈，只花一個鐘就以4:0擊敗馬克戴維斯，次圈對手係衞冕嘅希堅斯或中國同胞梁文博嘅勝方。