內地一直收緊水喉，搞到「缺水」嘅中小企借大耳窿成行成市，幫商家佬將家產變現金嘅當舖亦好似雨後春筍，令原本就缺人嘅內地典當行業霎時間鬧「人才荒」。新開嘅中小型當舖四處高薪挖角，好似喺北京嘅典當鑑定師，過檔嘅人工一般都倍數咁加，連啱啱過試用期嘅新仔都俾人撬走。
鑑定師人才難求
好似內地寶瑞通、華夏呢啲大型當舖，缺人係擴張最大嘅難題，月薪出成萬蚊人仔都好難請到人，特別係黃鉑金、翡翠、名錶呢類物品嘅典當鑑定師最缺人，其次就係熟悉房地產、汽車業務，同埋中高級管理層嘅人才，家都係獵頭嘅主要目標。
內地目前並無專門培訓學校，就算有相關學科嘅畢業生，因為冇實戰經驗，為免收假貨都需要一段時間先上手。
另一方面，由於部份典當品涉及歷史價值同名人效應等唔同嘅因素，開價可以相距甚遠，新人唔識分辨，分分鐘高價收貨，拖累當舖蝕大錢。