每年2月，成雙成對嘅就最忙，大家都絞盡腦汁希望喺情人節為另一半帶來驚喜，傳統上男仔送禮物向女仔表達愛意，但時代轉變同品牌宣傳效應下，女仔似乎比男仔更緊張，Google近日公佈情人節英文相關搜尋字眼統計，發現女仔搜尋「送給男朋友的禮物」壓倒性多過男仔，高出3倍幾。
「單身」搜尋7年倍升
大家對情人節禮物嘅要求越來越高，最好講求獨一無二，因此搜尋「獨特的情人節」、「手製情人節禮物」同「心形食品」較去年增加約兩成，而「心形pizza」升幅最勁，增幅達50倍。
冇時間準備嘅，送鮮花、朱古力同心意卡都係不二之選，玫瑰花仍然係最熱門選項，其次就係蘭花同百合花。朱古力方面，白朱古力略勝一籌，搜尋量比黑朱古力同牛奶朱古力分別高45%和49%。
咁單身一族又點算呢？單身都唔弱，原來「單身情人節」搜尋量較05年增加1.45倍，睇嚟情人節唔單止做情侶生意，單身一族嘅商機先至係後起之秀呀！