星美國際（198）係內需版塊受惠一員，有得諗。祖國電影局早排公佈2011年全國票房，達到131億銀人仔，再創高峯，好似星美呢類兼營影院及製作嘅有實力企業，肯定肥仔水。而星美兼係影院搞埋「星美匯」商品店，開多條生財之道，食住內需消費潛力，又係另一個中線亮點。星美上年因為配股及可換股票據兌換，股數大增，喺攤薄效應下，PE會高咗，未必太靚仔，但好似上邊講，祖國電影市場火紅，星美keep住增長，2013、2014年PE應該回順番，冇問題。再講，呢期票據已兌換嘅15億股，每股換股價0.295元，星美現價（0.255元）仲要低過換股價，冇有怕。呢轉趁低買星美，博翻半番到上年個橫行頂0.4元，星美PB不過1.3倍咁大把。
冠軍科技殘爆反彈
冠軍科技（092）現價（0.107元）係挨近03年沙士期後，近8年嘅低位！冠軍由07年一插到底，對上沉重蟹貨區，係要講到上近0.6元，現價有排未到。又集團呢個超級低殘價，NAV折讓係高達91%。將NAV大打五折，冠軍折讓仍然有81%。係咁易博冠軍彈20%到0.13元，NAV折讓係咁易收窄到90%，但折讓仍然離晒譜。
錢雋