過去一周，大市雖然曾經闖上21000點關口，但面對去年8月初的巨大下跌裂口，投資者難免會較為審慎，而且累積升幅已大，升浪亦已持續個多月，要再一舉攻克這個裂口實在不易，結果上周五港股出現回吐，與前周相比，期指只係上升了40點。
主攻二三線實力股
然而，市有市悶，個股卻百花齊放，仿似牛三雞犬皆升的日子般，細價股幾日升以倍數計的例子也不少，其中最矚目的一隻，自然係彤叔最近增持了的「能源」股，公佈增持消息後，由6毫幾炒到最高逾2元，就好似昨日本報財經版所報道，最近散戶不但不用問你冧把，反而倒過頭來畀返冧把你。
有經驗的股友見此現象，自然有點不自在，不過，筆者認為毋須自己嚇自己，細價股暴炒是資金推動，尤其近日有部份基金為追數亦加入快閃行列，但有實力的二三線股炒起，主因是早前因悲觀情緒影響，令估值過低的情況出現，到了今日，大家發覺歐債問題都唔係咁可怕，美國的復蘇勢頭更似越來越好，自然開始入返貨，所以這類股票現時只是處於回歸合理值的道路上。
外圍股市因為希臘問題而回調，執筆時尚未有希臘國會表決的結果，但姑勿論如何，調整應是另一次吸納機會。
至於對象方面，應集中在有實力的二三線股，而非大股，因為既然對後市看好，便應該較為進取，選擇潛在升幅、想像空間較大的個股，並唔係叫大家完全唔買大股，但在風險及回報平衡下，投資組合應該要持有一定數量大股，只係筆者認為在資金配置上可以較進取，投放多些在實力二三線上而已。
張士佳
寶來證券（香港）資產管理部董事
本欄逢周一、三、五刊出