大折讓股成為最新炒作主題，本欄上周五推介盈信（015），平地一聲雷，最多飆升43%，埋單仍漲29%，收0.54元，距離250日線（0.74元）仍有37%水位。上日表現只係估值重返合理水平的第一步，好戲仍在後頭！
捉到鹿要識脫角，今日繼續搵平嘢買。如果一個太古城單位值470萬銀，業主劈價出貨，賣80萬，相信你諗都唔諗就掃咗佢。不過喺股市，呢啲兩折出售嘅股票竟然冇人吼，實在奇怪，講緊嘅係莊士機構（367），最新NAV值4.70元，但係賣緊8毫子！
莊士機構於本港持有5項投資物業，最正當然係山頂歌賦山道15號物業（成本1.66億銀），重建後最近放售，傳叫價10億元以上，呎價11萬元，挑戰全港新高，如成功出售將勁賺8億幾，佔現時市值（12.6億）三分之二，可見目前估值低得太離譜。
紅磡蕪湖居賣樓收益將於今年入賬，佐敦ParksResidence及半山寶珊道項目亦密鑼緊鼓進行，未來唔憂「冇貨可賣」。另外，集團亦持有莊士中國（298）57%權益，可算係半隻內房股。
走勢上，莊士機構近日以圓底慢火炒上，成交趨增，短線以250日線9毫子為目標，中線望住1年高位1.18元，屆時仍較NAV折讓75%。
魏力