細價股炒到㷫烚烚，靜咗一排嘅師奶股神又翻生，上周一搭時碰到樓下順嫂，佢靜靜雞同股榮話隻166要爆啦。落到證券行，十個有五個都係攪緊隻166。對上一次師奶講冧把俾我聽，係舊年十月底，大市結果係11月中旬掉頭插水，半個月跌2000點。前車可鑑，信奉相反理論的筆者，立即感到一絲寒意。
講開隻166，名稱叫新時代能源，2月1日開始起步，四日爆升1.8倍。很不幸，順嫂叫我買嗰日，就是周內見頂之時，收報1.82元，上周五收1.42元，四日唔見22%。新時代炒得起，再一次多得彤叔效應，鄭裕彤增持消息曝光後，成交股價齊齊大躍進，不過可能彤叔trackrecord唔多好，今次泡沫似乎較預期早爆破。
港交所資料，在港上市名稱有「資源」的股份超過60隻，個名有「能源」的超過50隻，如果有「礦」字的接近30隻。粗略統計，經營礦業或資源的上市公司，估計超過200家，佔上市公司逾十分之一。
礦業股外闖危機重重
近幾年，除央企及民企資源股外，已不沾手在中國境外的資源股，對借殼或變身的股份更充滿戒心。事實上，企業變身資源股，就算是搞到大龍鳳，市值曾翻上至千億的蒙能（276），到家仍是齋talk冇嘢睇，07年收購蒙古大煤礦，結果到現時一粒炭屎都未能運出蒙古，股價由高位18元跌至毫子股，累跌95%。彤叔同為蒙能與新時代最大股東，後者07年收購阿根廷油田，到現時一桶油都未有，股價累瀉97%。
變身後的礦業股，面對三大問題。一是過江龍不敵地頭蟲，就算真的勘探成功，但如當地政府有心玩嘢，你掘到不代表你可以運出去，去年蒙古頒佈禁止採礦法，一眾在蒙古有礦產的上市公司立即頭痕，無論儲藏量有多大，未能運出亦是徒然。
第二，中國以外的礦股，多是山旮旯（粵音卡啦）咁遠，西伯利亞礦業（1142）買俄羅斯煤礦，甚至中聯能源（346）收購非洲馬達加斯加油田，由勘探到投產，無十年都要七年，由於礦業項目都有指定勘探期，時間一到，隨時渣都冇。
第三，天下無免費的午餐，由開礦到投產，投資者恐怕要不斷地籌錢集資以應付開支。即使幸運地有金有油掘出，股東亦要做好心理準備齊齊籌錢玩落去。
股榮