人來人往，只傷感一代名帥卡比路決定離開後，仍被全英「鞭屍」，撐一個私德不檢嘅泰利任隊長，卻受盡唾罵，那些小報所謂12宗罪，看官可能看得過癮，但睇真啲用腦想真啲，你我也識發笑。有機會留低的，自然要爭氣，今天撐帥位不穩嘅波亞斯，領車仔作客食「拖肥糖」愛華頓。
寧死不降，最有「吉士」仍推基斯杜化森巴，布力般自從年頭「失去」呢位中流砥柱後，更成賭友甜心，長買佢哋對家冇錯。領隊卻恩料子唔多但冇錯，卻對隊長罷踢冇晒符，上仗球隊慘被阿仙奴痛宰七個一皮，兼有正選中堅基維領紅，又要扮死狗認低威想盡快同呢位剛果巨人和好；但兵荒之際，再傳出森巴踢預備組拉傷鼠蹊唔使預。咁蹺？玩嘢？
布軍周末護級大戰返主場鬥昆士柏流浪，幸有射手耶高保復出；對家上仗因施斯衝動被逐，無厘頭反敗畀狼隊，也一腔怨氣。今場護級戰最佳投注策略捧入球「大」望鬥攻搶3分止血；昆軍換帥步入正軌，隊波執靚咗，博埋下盤及「客其他」波膽也可。
卻恩未走，或者係布力般嘅印度班主慳皮不願「補水」；至於爭霸幾無望嘅車仔，由油王阿巴高薪聘用、享負盛名嘅少帥波亞斯，前途亮起紅燈！據報阿巴上場和曼聯一役賽前，已罕見今屆連睇波都少咗嘅情況下，親自督操。老細足球攞威要緊成績至上，理你乜名帥要賠大筆錢；油王當年連摩帥都迫走，根本唔怕落自己面，呢幾日繼續督操下，剛又傳出卡比路或接任。
腹背受敵，最重要做好本份博番老細信任，事實係車仔上仗所見，有加納鐵人艾辛正選投入戰陣後，上半場真係打到紅魔謝晒；費托喺入球紀錄上仍「廢」，但狀態非差。波帥全場亦只作一個變動，已知對班主力表現收貨，今場鬥近年主場差勁、但上兩仗又突然神勇連富咸同曼城嘅愛華頓，賠率已回到客軍少讓平/半；但堅信車仔上番力，上仗被追番3球主要拜曼聯多踢一人（球證韋比）所累，今場冒進者可博4倍[-1]「客勝」。
至於早場雙紅會，一隊場上每每踢多一人，一隊遇強越強、每季只以殺低對方為大業，勝負難估；但單睇艾拉同阿蘇寃家聚頭，夠過癮了。
下次見報(15/2)
蘋果波神
今日重心推介
熱選
車路士(上)
冷選
車路士勝[-1](4)