我唔知卡比路同英國足總有乜恩怨情仇，但英足總今次嘅做法，俾着我係卡比路，都一樣拍枱走！
泰利係咪真有種族歧視安頓費迪南，要等到7月至有分解，但英足總話褫奪就褫奪泰利的隊長身份，而卡比路事前毫不知情，要聽新聞、睇報紙至知，真係情何以堪！係人都知卡比路做埋歐國盃都唔撈，英足總連呢幾個月都唔等得？明顯地係對卡比路不義！
英足總玩嘢，卡比路一怒掛冠，匆忙間惟有搵英格蘭21歲以下國家隊教練皮亞斯頂檔，直至搵到人為止。在歐國盃舉行前數月還上演這樣一幕陣前易帥，難道還能要求英格蘭代表隊有好表現？那就真是妄想了，若英格蘭得不到好成績，英足總責無旁貸，是對英格蘭球迷不忠之舉！
我不敢說卡比路戰績彪炳不該炒，但凡事相對，以艾歷臣的表現都可以撈5年幾咁耐，何以對卡比路這般無情？英足總經歷了艾歷臣和卡比路兩個非英格蘭人做領隊的朝代，加埋喺佢兩個中間做咗16個月，帶到英格蘭入唔到圍踢08歐國盃嘅麥卡倫，3個人前後加埋11年，呢11年英格蘭在國際賽上並冇任何寸進，實在全靠英足總領導「有」方。
在今次陣前易帥事件中稍讓人寬慰的是，蹉跎11年之後，起碼出現了一個叫人齊聲叫好的領隊人選，就是哈利列納。看看他帶領熱刺的成績，今季暫時只落後曼市雙雄，車路士都排其後，以投放資源計算，熱刺的表現十足十黃興桂的名句「蔗渣咁嘅價錢，踢出燒鵝咁嘅味道」！
除咗里奧費迪南同朗尼支持，連我這個「愛阿仙奴，即恨熱刺」的死忠英格蘭粉絲，都贊成由哈利列納出任英格蘭領隊，不過一如他本人口風，執教英格蘭國家隊是無比光榮，但他不願同時執掌球會以及國家隊，換言之，完成今個球季，哈利列納就會接任英格蘭國家隊，而且肯定地會削弱熱刺來季成績，真係「哈利」路亞！
文：盧覓雪