現年27歲、喺台灣發展嘅日籍女藝人Makiyo，同34歲日籍友人友寄隆輝之前襲擊的士司機搞到台灣滿城風雨，雖然被打嘅林姓司機已經過咗危險期，但Makiyo可能因為罪成而喪失工作證同被逐出境。
友寄跪地認錯
友寄前日去咗地檢署接受調查，最後用咗10萬新台幣保釋外出，佢一出到門口就俾一個憤怒嘅民眾推落地。之後友寄返咗朋友屋企，到凌晨兩點幾佢發咗段聲明道歉，話會留喺台灣接受法律制裁，仲願意承擔Makiyo嘅刑責。跟住友寄仲現身，即場喺街磕頭跪地4分鐘，向所有人道歉。
其實飲醉酒唔係犯事嘅理由，前日就有一段錄音曝光，聽到事發時有把好似Makiyo咁嘅女聲叫「揍他」，但Makiyo就話因為自己飲得太醉所以唔記得，而檢察官就話因為呢件案涉及嚴重傷害罪，所以就加咗保釋金。
另一方面，Makiyo嘅事又成為政論節目話題，啲節目仲搵埋真人模擬事發經過，但有網友話經過連日嘅報道，對件事已經有啲膩。