土瓜灣業主有高人指點，封死平台共劏出二十個發財房，所謂發財是真的。明眼人一眼睇得出唔妥當，但記者向屋宇署和消防處舉報，兩個單位異口同聲指，上述劏房沒違禁。兩個政府部門，向市民發放一個龍年最易搵錢的訊息，就是盡快入市，向舊樓埋手。劏房投資不大，回報超高，最過癮的是，政府部門睜眼不管，就算燒死房客，都是貴客自理。到時政府還可以學渣馬高層，找屋宇署的專家認證，指稱劏房跟馬拉松一樣，住客和跑手，要量力而為，死頂才出事，愛拼不會贏。「溫度和濕度對馬拉松沒影響」，OK，燒他媽個三級火七屍八命也不涉政府監管不力。人有三衰六旺，鬼叫你窮，窮就當然頂硬上，死頂，抵死，點解唔搵心臟科醫生驗完身才跑？嗯，半山豪宅你唔住，偏偏往奪命土瓜灣自動送上門。唉，點解你唔反省一下，點解要做劏房中的二十分之一，而唔係李嘉誠第二？
既然屋宇署消防處自廢武功，劏房大王索性做大佢，佔領中環滙豐銀行地下，那塊地皮，點止劏二十個房！有違規嗎？這是全球化金融反思大革命啊！劏了先算！