仲有三日就到情人節，仍然單身嘅你，出街難免會有啲寂寞難耐，唔想咁樣？今日我哋搵嚟婚姻配對工作室——摩登紅娘BoBo，同心理分析師Silver，同大家解構追男媾女攻略，務求令大家極速擺脫單身，情人節唔使孤伶伶兩頭望！
記者：陳家蕊
攝影：譚盈傑
Model：Benson、Kimberly、Suki&James@PureModels
場地提供：花團錦簇
鳴謝：LoveActually婚姻配對工作室（39292077）
剩女 咪扮絕對矜持囉！
女追男真係隔層紗？Sorry！家已經無呢支歌仔唱！香港性別失衡，女多男少已經唔係第一日嘅事，所以「剩女」唔係一個形容詞，而係一個事實！
心理分析師Silver：「但好多女士仲好似唔多察覺，好多時候仲係會保持絕對矜持等人追，又或者人哋約佢出街，就已經多番考慮，要男士約多幾次先應約，其實呢種『絕對矜持』喺男仔眼中，簡單嚟講就係吊高嚟賣，但係家男士選擇多，女士們如果想擺脫單身好應該主動出擊！」
但所謂主動，並唔係叫你不斷約嗰個男仔，又或主動同佢講我好鍾意你，事關男仔有時候好犯賤，太容易得到，不單只唔會珍惜，太主動有時仲會嚇怕佢哋。所以所謂嘅主動，其實係俾多啲機會，令心儀男仔約會自己，例如你話多咗張戲飛，問心儀對象有無興趣一齊睇，橋雖然好似舊，但係其實絕對Work！
如果心儀對象約你去街你唔得閒，千祈唔好就咁講你唔得閒！咁樣男仔好易誤以為無機會，又或者覺得你好難約，你可以講：「我今次唔得閒！不如約下個星期三！」講定下個得閒日子，就唔驚斷纜啦！
港男 知唔知乜嘢叫乾淨？
男追女學問，可謂老生常談，其實亦都離唔開主動同大膽，但係咩類型男仔最受女仔歡迎？根據婚姻介紹所LoveActually的BoBo講，最多女士寫出選擇男士的首要條件，並唔係有樓、有錢，而係乾淨！乾淨企理嘅男士，令女士感覺更加可以接近，想受歡迎原來話咁易！
反而女人心海底針，男士想知的可能係女仔諗緊乜？當表白咗之後，點解佢話要考慮吓？即係點呢？Silver教路，女仔話考慮即是有機會，但係女仔永遠會享受追求過程攤長些，所以男仔聽到女仔話考慮，唔好咁快放棄！但如果個女仔明示、暗示係No，咁有九成以上機會，你需要放棄喇！
實況「媾ing」攻防
經過前兩日喺玄學同形象指導之後，我哋專登為Suki安排咗一個識新朋友的機會，而呢個食飯過程入面，BoBo同Silver就同我哋講從中可以搵到好多增加異性對你好感度的方法！
朋友新相識，究竟可以講乜？首先可用有趣新聞打開話題，但切忌談論宗教、政治，好可能大家意見不合，好快面阻阻；另外都唔好咁快問人收入同過往戀愛經驗，感覺拜金之餘，仲好易勾起人哋不快回憶！
想大家約會食飯開心啲，不妨多些讚美別人，例如當日化妝或衣着，留意對方的細節，總之唔好諸多挑剔，另外在談話時，多啲眼神接觸，代表你認真聆聽！咁對方對你的好感度自然大增！
港男講女
港女講男
