有讀者來郵，大駡左丁山講自由行「順者昌，逆者亡」，冷酷無情。左丁山在大學主修經濟學，去到泰國讀碩士，一次做功課寫一篇小論文時，江郎才盡，引用一啲社會政治理論來解釋所見現象，俾教授痛批：「不准用非經濟因素來解釋經濟現象」，好彩平時有印象分，否則幾乎肥佬。經濟學講求理性分析，睇數字數據，幾難加入感情成份。香港在殖民地時代，被稱為「借來的土地，借來的時間」，一九四九年之前，港英政府只滿足於管理一個轉口商埠，做歐洲與中國貿易嘅中間人，大財團如怡和、太古、會德豐，銀行如滙豐、渣打，都集中於貿易及貿易融資，邊度會搞工業、金融建設呀？那是中國的事，是上海的事，上海才是遠東金融中心，比香港先進太多；那些年，左丁山父親有時在周末坐火車到廣州睇足球，廣州有球迷落香港睇南華對中華，兩地人自由來往根本天然融合，經濟是一國、政治是兩制，與今天並無大分別。分別係當時大陸人睇唔起香港，上海廣州人認為香港無甚文化，缺乏文人雅士、國學大師，講洋化程度又遠不如上海租界。
一九四九年後，共產黨當權，剷起私人業權，政治鬥爭連年，全國變成一窮二白，一九七二年時中國外匯儲備少得可憐，不及今日三萬一千餘億美元一個小零頭。因內地共產政權當道，與西方對着幹，長時期與英美處於敵對互相猜忌關係，粵港當然不能融合，溝通亦難。偏偏在此時候，因外省資本家、學者逃港，帶來資本與學術，大量難民逃港，帶來大量廉價勞工，港英不鼓勵，不打壓，任由經濟自然發展，於是產生東方之珠奇蹟，輪到香港人睇唔起大陸人無文化（因已剷掉）、無管理知識，上海廣州係五十年不變、落後之城，香港人在一九七八年中國開放後返回內地，優越感十足。今天呢，威人威威不是威，省港融合回復到八十年前狀態，歷史循環運行何足為奇，只是香港人叻過八十年前太多而已。但從地理與體積睇，香港只是一條中國大藍鯨旁邊嘅一條紅衫魚，誰是主角，一睇便知。有人高呼閉關拒外，簡直笑話，香港有何資格維持一個自足經濟，螳臂擋車，智者不為也。爭取與教育內地同胞認同香港文化係可以嘅，排斥佢地喎，當隨口噏發洩情緒啫。