好多住喺外區的人都話唔會喺屯門買樓，我就唔係咁睇。我喺屯門土生土長三十年，三年前做咗老竇，現在一家三口同阿媽一齊住在六百幾呎的公屋單位，其實個仔滿月時，已經想過買樓，好讓屋企人有更多空間。我已經不算貪心，一直心儀屋企對面的兆麟苑，不過是百多萬貨仔。可是一場金融海嘯，原本保守的我，原以為藍籌股唔死得人，都把我預備作為首期的積蓄陰乾到剩餘十多萬元，即使勉強上車，也不足以做個簡約的裝修。
兩年後的今日，做經紀仔的我，死跑爛跑，算是跑番股票蝕去的廿多萬元，叫做賺夠三成首期去上車，加上老婆見到個仔的玩具越來越多，覺得長此下去不是辦法，成日催我買樓、要上車，於是過去半年，我不停去睇樓，當然點睇都只是睇兆麟苑。
鍾意兆麟苑，原因好簡單，因為近阿媽，他日兩公婆去遊埠，都可以叫阿媽過來睇住阿仔，平時又可以返去睇阿媽，兼且食飯。
好可惜，睇了不知多少個單位，一直也沒有我理想中的高層向海戶，你可以話我揀擇，但希望擁有相關單位的街坊，假若你們飛黃騰達，請以合理價出讓，以圓小弟多年的心願。屯門黃仔
本欄園地公開，歡迎各界來信，以450字為限，請電郵至mailto:[email protected]，註明《家》樓民講場，請留聯絡電話。編輯保留文章的刪減權。