馨香宴上，遇到馬壇才子余伯樂。冇幾耐之前，有一隻馬叫做「白蹄烏」上陣，左丁山只知其名，不知其背後典故，又費事去查，點知睇余伯樂專欄，佢就解釋得一清二楚，原來名字來自「昭陵六駿」，昭陵就是唐太宗李世民之陵，佢生前東征西討，於貞觀十年令工匠將佢騎過嘅六匹駿馬雕刻成石像，用於日後成陪葬，呢六匹馬各有名堂，分別係「特勒驃」、「青騅」、「什伐赤」、「颯露紫」、「拳毛騧」與「白蹄烏」。左丁山記得以前在馬場見過「特勒驃」與「颯露紫」兩隻馬，賽績難以恭維，現在呢隻「白蹄烏」，亦唔見得特別出色。反而一位西人馬主唔識中文，但佢名下嘅馬如「花好月圓」、「詩情畫意」、「鳥語花香」以至新馬「花月春風」，皆以古雅中文為名，全是高班優質馬。余伯樂話明代唐伯虎有「花月吟」傳世，「花月春風」之名源於「花月吟」！
此晚余伯樂送來一本新書名為「余伯樂馬壇聯話」，恰好有聯王之稱嘅前輩楊瑞生在座，立即帶佢去見楊翁，等佢向前輩討教。呢位中大中文系肥佬出校生，慣咗由崇基行去沙田馬場睇馬，一九八七年投身報紙馬經版，圈內人無所不識，佢幾時開始寫對聯嘅呢？據佢自己在本書講到，九八年三月，大有前途嘅廿三歲女騎師簡慧榆騎「漢廷之寶」在沙田墮馬身亡，全港馬迷痛惜，蘋果日報馬經版以全版篇幅刊出簡慧榆記念特輯，編輯史光泉叫余伯樂寫大標題，余伯樂感觸之餘，寫下輓聯作為大標題：
馬國出英雌，鞭揚轡挽，二十年精彩歲月；青墳埋慧骨，玉殞香消，萬千個失落榆迷
因「蘋果」馬經版讀者眾多，此輓聯刊出後，余伯樂收到不少對聯前輩批評，指正修改，余伯樂捧讀眾多評語之後，對對聯着了迷，不停創作至今。後來受到讀者的挑戰，出上聯要他對下聯，一位讀者出題曰：「古堡好敦倫，敦倫總是倫敦好」，余伯樂對以下聯：「長堤難約妞，約妞緣何紐約難」，左丁山以為對得稍嫌勉強，讀者如有更好的下聯，不妨交與余伯樂參考。
余伯樂的父親算是司徒華的學友社學生，華叔逝世後，余伯樂撰輓聯悼之：司事支聯，浩氣長存凌魍魎；徒盟繼續，丹心不滅祐中華。