鄭秀文（Sammi）和古天樂相隔8年，再攜手演出電影《高海拔之戀II》。兩人在戲中的感情是淡淡然的，Sammi也鍾愛這種淡淡然的感覺，她直言現在不嚮往轟烈愛情，因為「轟轟烈烈通常都冇好結果，一陣炸死自己」，還是簡單最好。
鄭秀文在電影《高海拔之戀II》中，一直等待失蹤的丈夫回家，期間遇上古天樂，當中兩人淡淡然的感情Sammi十分喜歡，她說：「我好鍾意呢隻淡然嘅味道，好似對感情有一種慨嘆。戲中嘅我都幾執着，但係我本身唔會執着，因為執着係冇用㗎，反而係要努力維持。」不少人都嚮往轟轟烈烈的愛情，現時的Sammi絕不同意，她笑言：「轟轟烈烈通常都冇好結果㗎，一陣炸死自己呀。」
爆拆更添滄桑味
Sammi的角色正如她所說有一種淒美滄桑的感覺，她表示當地氣候乾燥，令她的皮膚出現爆拆情況，正好為她增添一份蒼涼的味道，她說：「拍戲要我粗糙啲都OK，上台唱歌咁淡妝又爆晒拆就一定唔得。」她覺得感情戲的拿捏比以往做得好，最重要的是懂得抽離，她說：「一cut機就冇嘢啦，唔同上次《長恨歌》時因為有病，cut咗機都喊半個鐘，今次反而係要用一朝嘅時間去培養情緒。」
對於古仔而言，拍攝《高》片最痛苦的是受到鼻竇炎困擾，他說：「我全家有鼻竇炎，即係入面積咗水，喺高氣壓嘅地方就會壓住神經線，令到眼痛耳痛。雖然有食止痛藥，食完會暈同嘔，嗰種痛仲痛過偏頭痛，我嗰日痛到成日耷低頭唔出聲。」
古仔愛香格里拉
不過，古仔非常鍾愛拍攝地香格里拉，加上拍攝時間穩定，所以返港後身體好了，他認為當地是一個退休的好地方，他說：「嗰度成日見到牛、豬、湖光山色，啲人又熱情，我個人唔怕悶㗎，況且喺香港放假都係留喺屋企一日，6點幾就食飯，好早㗎，所以去嗰度住絕對唔係問題。」
採訪：李珮洳 攝影：陳順禎